(( صعب تفارق من تحب))

(( صعب تفارق من تحب ))


ملاحظه؛


ماكنت ابي اكتب قصتي بس بعد الاحاح من ناس عزيزين علي اصروا اني اكتبها ونزلها و
اعذروني عن الااخطاء الاملائيه

اولا نبذه صغيره لتعريف عني
انا اسمي عبدالمحسن ينادوني اهلي واصحابي عبادي ماادري دلع او اختصار لاسمي الطويل عمري 25 سنه


(( صعب تفارق من تحب))
................
باابتدي بالقصه .
قبل اربع سنوات تقريبا كنت عاش حياه عاديه مثل اي شاب بعمري فجأه صار لي موقف غير لي حياتي
بدايه
أختي الكبيره: عبادي ابيك توديني السوق
انا:اووه انتي تعرفين ماأحب اروح لسوق
اختي:ياعبود مافيه احد غيرك موجود زي منت عارف محمد مداوم وحامد راح يودي امي لخالتي ومافيه احد امانه عليك ودني
انا :زين خلاص يالله انتظركم بسياره
مشينا وصلنا محل كبير
ماأبي اقول اسمه عشان مااسوي دعايه خخخخ
توة فاتح يعني جديد
وكان مرة مزحوم
..اشترينا أغراض كثيرة
وما كانت فيه عربيه تشيل الأغراض
من كثر الزبائن
فيه سله
بس ماتشيل أغراضنا
وكنت متضايق
مرة من الزحمة ومن الأغراض اللي معي
المهم مر من جنبي
ولد صغير وسيم
معاة عربيه يمشي فيها
وكانت فاضيه
وقفته
وقلت له: لوسمحت عطني العربية ماتشوف أغراضي معي
موشايلتهن السلة
قال :معليش حتى انا معي اغراض
قلت: زين وين اغراضك
قال: عند اهلي هناك
قلت: زين مشيت وشوي بعد ربع ساعه
نفسس الولد يمشي من جنبي وعربيته فاضيه
قلت: لااخوي الصغير
رح للولد هذا
وخذ من عندة العربيه هذا شكله لعاب ماعنده اهل ..؟اخوي راح.. لولد
اخوي خواف خلاه وجاني
وقال: رافض يعطيني (وهوكذاب
انا شفته ماراح
بس يخاف الولد يهاوشه )
المهم بعد نص ساعه او اقل مر الولد نفسه من جنبي وعربيه برضه فاضيه
قلت بقلبي الولد هذا ماعنده لاهل ولاشي
مسكة العربيه ووالد
وقلت :تعال مسكتك وحطيت السله بالعربيه
وقلت: له انت كذاب
وكنت اقولها مبتسم وبصوت اشوي عالي
والولد يطالع بي ويبتسم! ويطالع باحرمه بجنبه مهي كبيرة مرة
وكانت معها بنت مبرقعه
المهم عرفت انهم اهله وحسيت انه طاح وجهي!! وشلت السله من العربيه ولحظة شيلتي للعربيه طاح غرض مني!
انزلت ام الولد وجابت لي الغرض
وانا من زود الاحراج ولارتباك قلت :هذا مولي
قصدي الغرض اللي طاح مني
قالت ام الولد: ياولدي هذا طاح منك وشلون مولك؟
حسيت إني وقتها غبي
المهم اخذت الغرض
يوم مشيت طالعت للولد كان يبتسم لي وبتسمت له
وبدون قصد طاحت عيني بالبنت المبرقعه!
تفاجت !!
انها تطالع لي وبنظرة غريبه!
بس للامانه كانت نظراتها قتاله وعيونها مااشالله حلوة
المهم مشيت ورحت للاختي واخوي كانت فيه طاوله كبيرة فيها ملابس اطفال انا وقتها اكلم اختي حسيت فيه شخص يناظرني التفت له الاكانت بنت مبرقعه ومعه امها
اقول بقلبي هذي وين شايفها؟ وشوي جاء الولد الصغير
وبكذا عرفتهم !
وكان الولد يناظرني ويبتسم واخته الي هي البنت المبرقعه تناظر باخوها ولي مستغربه ليه يبتسم لي
المهم لقيت لي عربيه وصارت بيني وبين اخت الولد نظرات استغراب
وبدون أي مقدمات مدري وش جاني
صرت اطالع لها وابتسم واسوي حركات بفمي واشوي اغمز بعيني
اسوي مثل مااسمع من الشباب
هي تطالع لي وتناظرلي مستغربه
المهم جينا نبي نروح
وكانو المحاسبين عليهم زحمه وشوي مع زحمة السوق شفتها من بين الزحمه الناس ا
وكنت اركب فوق العربيه
واشر بيدي وبراسي
ابيها تشوفني
اصلا اول ماركبت فوق العربيه وهي تلمحني!!
وكنت اسوي حركات استهبال
للمعلوميه انا استحي عند الناس بس ماادري وش جاني
وشوي صاروا قريبين من عندنا وكنت اهز براسي ايه ولا لا يعني من فوق لتحت وليمين ويسار
انا ترا فاقد الامل لاني كنت وقتها لبسي عادي ماكنت مكشخ يعني كذا قلت جت جت ماجت ماجت المهم!
واشوي الا البنت تهز براسها ايه انا ارتبكت ماادري ايش اسوي رحت للكاشير وخذت من عنده قلم ورحت بعيد عن االزحمه وكتبت رقمي
وتفاجات انها بجنبي تقول هات الرقم بسرعه يوم مديت يدي ابي اعطيها رقم مدت يدها وكنت اطالع بيدها ورفعت راسي تفاجأت ان عينها بعيني وكانت قريبه مني واخذت الرقم راحت من عندي بسرعه
ماني مستوعب الموقف حسيت اني مضروب بأبرة مخدر وقفت مكاني تفاجأت بلي يشد ثوبي
يقول عبادي مشينا
طالعت به الا اخوي
قلت:يالله مشينا ؟؟؟
...
وصلنا لبيت وانا مستانس اول مره ارقم بنت
كنت كل فتره ..
اطلع جوالي من جيبي اشوفه يمكن دق وانا ماسمعته
صار لي يوم وانا على هالحاله

المهم
دق جوالي الساعه 8قبل الصلاه العشا رقم غريب
وانا كنت بالمقلط
والعيله كلها متواجده
وقمزت من مكاني
وطلعت بسرعه
ابوي استغرب
قال: وش فيك عبادي
اخوي محمد:جاه اتصال من ام بي سي خخ
انا:بايخه ماتضحك طلعت من الغرفه ورديت فجأه استغربت صوت رجال
يقول: عبادي
حسيت انه قتل فرحتي
قلت :مين
قال: ماجد انا معرفت صوتي هذا رقمي الجديد
قلت: زين وش بغيت
ماجد:عساماشر معصب ها ولاابوك ماهاوشك انا وش دخلني تنفخ علي
قلت :ماشر بس اخلص باوضي لصلاه
ماجد :زين لاتاكلني في مباراه تعلب معنا زي منت عارف انت بدونك نضيع ياكابتن
قلت:مشكور والله لو أني ميسي ادري انكم ناقصين وداق علي بس زين العب متى المباراه ماجد :بعد صلاه العشا مباشره امرك واخذك جهز روحك زين بعد الصلاه لاتنسا يالله مع سلامه
انا:مع السلامه
مرني ماجد بعد الصلاه ورحنا ولعبنا وكل العاده انهزمنا وشوي تذكرت جوالي وفتحت دولاب سياره ماجد واخذت جوالي
ولقيت مكالمتين لم يتم الرد فتحتهن
الا رقم امي ورقم غريب
طبعا !
دقيت على امي
هلا يمه
امي :هلا يمه تعشيت يمه انت طلعت يولدي مع خويك ماجد وماتعشيت
انا:لا ماعليتس يمه لاتخافين ماجد يقول بعشيني ماجد يحط اصبعه الكبير على سنه يأشر طفران
قفلت مع امي
وقلت له :لاياشيخ مالعي منك طفران موطفران طلعتني من بيتنا انت تكفل بي تعشيني تسلف مالي شغل تصرف
ماجد:ايه بالمشمش اقول لوفزنا صح عشيتك بس انت سبب الخساره
انا:زين لايكثر نضام امريكي رحنا للمطعم تعشينا
وكل العاده مااسلم من مقالب ماجد
دفعت الحساب لانه بعد العشا جلس بدوره المياه نص ساعه عشان انحرج من المحاسب ودفعت الحساب!

(ماجدمن اعز اصحابي صديقي من ايام الطفوله يعرف اغلب اسراري وكل شي عني مرح طيب بس عيوبه ذبحني بالمقالب )
رحت للبيت وعلى طول اخذت دش وتسبحت ورحت لغرفتي اريح اشوي
كان جوالي على السرير تذكرته الرقم الغريب وبسرعه دقيت يوم دقيت الرقم طول مامسك الخط انفصل ورجعت ودقيت مره ثانيه علق اشوي انفصل الانفس الرقم يدق على رديت على طول
انا:هلابك
المتصل:مرحبا
انا بقلبي صوت بنت اكيد هي
هي:عبادي
انا اقول بقلبي شكلها وحده من خالاتي
انا :هاا وش عندك (اتكلم من دون نفس)
هي:عسا مزعجتك
انا :لاياخاله مزعجتيني
هي:اي خاله
انا :ها مين اجل
هي:انا البنت اللي بسوق
انا:من زود الفرحه تلخبط اي سوق ها وبعدين وش عرفك على اسمي
هي :انت كاتبه على ورقه ولا مضيع من كثرماترقم بنات
انا:ايه صح حطيت اسمي اما سالفه مرقم بنات من مزود حلاتي اللي يطش البنات بغمزه
هي:لاتقول كذا انت حلو بس ماتشوف نفسك
&&
(( الجزء الثاني ))

تعرفنا على بعض اكثر
وكانت تقولي لي ياعبادي ترا انت اول شخص بحياتي
و اول مرة اتجرا واخذ رقم
بس ماادري ارتحت لك
وحسيت انك شخص على طبيعتك شكلك طيب ؟
قلت لها هيه بنت
مااحب احد يتغزل بي
وكانت دائمه الاتصال بي
المهم تواعدنا في يوم من الايام نتقابل وتقابلنا الصبح
وكانت ايام عطله بس شفتها من الدريشه او من اشباكـ وبعدين من ورى الباب
وكانت ماشالله مررة حلووة
واللي محليها اكثر سمارها وكانت صغيرة حتى تشبه
ممثله مصريه مشهوره
بس هي للامانه احلى من الممثله ؟؟؟
مرة من مرات قالت لي عبادي ابي اقولك شي ؟
نفسي من زمان اقوله لك
قلت: لها قولي خير انشالله
قامت تعتع بكلام خايفه قالت انا احبك!
بسرعه نطقتها وقفلت التلفون رجعت ودقيت عليها
قلت :اموت بالخجل... تحبيني!
طيب وشلون اعرف انك فعلا تحبيني ! ابيك تثبتين لي
قالت :عبادي
انا مو بس احبك
انا اموت فيك
وانا تمنيت ان صدري شفاف عشان تشوف غلاتك
قلت: يابنت الحلال كلامك حلو بس ابي فعل ابيك تثبتين لي قالت :ابشر وش تبي اسويلك عشان اثبت لك حبي
قلت :انزين ابيك تقطعين يدك
وتعبين لي فنجان من دمك قالت :بس كذا ابشر بسويها بس وش تبي فنجان الدم
قلت:ابي اذوق طعم دمك حلو مثلك
سولفنا شوي وبعدين قفلنا الخط
باليوم الثاني دقيت عليها كل العاده
تفاجأت بعدم الرد
دقيت مره ثانيه ماردت
قلت :احتمال مانتبهت للجوال او نايمه
وكل بعد ساعه ادق ماترد
خفت قلت فيها شي
..
من بكره دقت علي
قلت:هلا والله وين الناس
قالت :هلا حبيبي اسفه جوالي كان بالبيت
قلت:ليه وانتي وين كنتي
قالت:بالمستشفى
قلت :ها سلامات وش فيك تعبانه
قالت:قبل البارح يوم كلمتني وقلت لي اقطعي يدك وعبي فنجال دم لك
قطعتها وكنت اعبي الفنجان والظاهر ماعندي دم اغما علي
قلت:ليه يامجنونه تسوين كذا
قالت:عشان اثبت لك إني احبك
عبادي لوتبي اخلع عيني وعيش عوره اخلعها وعطيك ايها
قلت:لا يابنت الحلال قسم بالله ماينمزح معك انتي مجنونه
قالت:عبادي خساره جدتي كبت فنجان الدم بزباله
قلت يابنت الحلال الحمدالله على سلامتك ولاعاد تسوين بنفسك شي
وتوعدنا من بكره وتقابلنا ولحظة ماشفتها حظنتني وبقوة وهمسة باذني
قالت والله العظيم احبك
ويوم انا حاظنها
قلت لها ابي اشوف يدك تفاجأت بالجرح
كان مره طويل
نص راحت يدها
مسكت يدها
وبست الجرح
وانا للامانه
كانت مشاعر اتجاها
عاديه؟
بس اجبرتني احبها ..
حبيتها
بجنونها
بعشقها
بطيبة قلبها
بروحها الحلوووووة
بخجلها
بجمالها
برشاقتها
بشعرها
تفهمني قبل لااتكلم
كامله والكمال لله
حبينا بعض للجنون
تعلقنا بعض اكثر لدرجه
اذا ماسمعنا صوت بعض نمرض نقللق يصيبنا خوف الفراق
نسوي المستحيل لجل نكلم بعض ونطمن قلوبنا
وصرنا بين فترة لفترة نشوف بعض
**
وكانت فيه عباره دايم اقول لها اذا تقابلنا
اميرة البحور السبعه وش عطتني
تقول: حلاوة
وارجع اقول :اميره البحورالسبعه وش عطتني تقول :بقلاوة
وارجع مره ثالثه اقول لها اميره البحور السبعه وش عطتني تجي وتبوسني مع خدي وتحظني
وكنا نعلب لعبه كلام العشاق حنا مخترعين ذي اللعبه
ان كل واحد منا يقول كلمه حلوه من كلام العشاق وكانت دايم تغلبني
اشرح لكم طريقه اللعبه بتطبيق معها
انا اقول لها:حبيبتي
قالت:حياتي
قلت:روحي
قالت:قلبي
قلت:عمري
قالت:دنيتي
قلت:احبك
قالت:اموت فيك
قلت:ياشمعه حياتي
قالت:يانور حياتي
قلت:ياأغلا ناسي
قالت:ياحلمي الوردي
اجلس افكر افكر بكلمه قالوها العشاق عاد هي تحسب دقيقه
اذاانتهت الدقيقه فازت
وعلى هل الحاله كل يوم نعلب هاللعبه مااندري ليه نحبها بس نحس ان فيها شي يعبر مابداخلنا
*
وكانت دايم تقول لي عبادي اخاف انا من غدر الايام اخاف ياعبادي نتفارق عبادي امووووووت ولافارقك عبادي انت اغلى شي بحياتي وعلى فكرة(( اميرة امها متوفيه وابوها متزوج وهي عايشه عند جدتها ام امها واللي كانت معها بسوق خالتها وولدها))
واميرة كانت بالنسبه لي اهم ثلاث اشخاص بحياتي
1امي 2 وابوي 3 واميرة
وكنا يوميا نتصل وكلم بعض وكنت اخاف عليه
من كل شي صارت
مررة غاليه عندي
كنت ماشوف دنيتي حلوة بدونها
كنت اقول لها ياجعل يومي قبل يومك
كانت تصرخ لالا لا لا تقول كذا
انا يومي وقبل يومك
كأنا ندري أن القدر مايبي يجمعنا
واخر شي نتفق انا نموت مع بعض
كنت دايم اخاف من هذا اليوم لايجي
وكان صوتها مرة حلو كانت تغني لي اغنية
خالد عبدالرحمن
(( خبروه أني على وصله حييت وان تفارقنا ترا موتي دنا ))

وكنت اغني لها اغنية
راشد الماجد (( ياسالوني ليه احبك حب مااحبه بشرليه انتي في حياتي شمسها وانتي القمر ))
>>

(( الجزء الثالث ))
هذا الجزء كله مواقف وقصايد
كنت دايم اتغزل بها وكانت تقول انت ياعبادي كلامك شاعري بالله عليك جرب ممكن تقول قصيده وفعلا هي او من اكتشف اني موهوب بشعر
كان كل موقف يصير بيننا اترجمه لها بقصيده او اعبرة لها بقصيدة


..فيه خاطرة غزليه ديتو كتبتها بها
اميره:
انا عمري ماحبيت لأحد
وما شوف بالدنيا غيرك ابد
واشهد ان امك جابت ولد
وزيه ما فيه
وماأظن الاقى لك شبيه
بس افهمني
عبادي:
وشلون افهمك
وكبريائك مجننك
وشايف حالك
وتتباهي بجمالك
لا وبعد مغروره
وتمثلي دور غيوره
اميره:
امير والله امير
بس اسمعني للأخير
عبادي ياودادي
ياسيد أسيادي
ابي شوقك لي يزيد
وابي غزل جديد
هذي كل الحكايه
ياعمري يامنايه
عبادي:
لا هذا حدك
انا ماني لعبه بيدك
انا لي كرامه
والحب له احترامه
اميره:
ليه ياعمري كذا
أهدأ مالك الا الرضى
وش تبي اعمل
قل و انا افعل
عبادي:
ابي تحترمي شعوري
وغيابي وحضوري
وتسمعي الكلام
ولاعتاب ولاملام
اميره:
والله ان زعلك شين
بس ابشر
من العين لعين
عبادي:
بنات أخر زمن
اسف
ياعمري والله احبك
وقلبي هو قلبك
وانت كل حياتي
وأخر محطاتي
بس لا تزعلي مني
المزح ابداعي وفني
وماأبي الكلام يطول
كل شي له أصول
اميره:
خلاص انهيت كلامك
عمري باقي دوري
وماتمشي الابشوري
دوري بالغزل
اسمع كلام عسل
عمري اناأكثرمنك احبك
والله لايحرمني منك
ومن ابداعك وفنك
يانسمه هواي
يا سيد مناي
ياأمل عمري
ياعطرصدري
يا أحلا رجل بدنيا
انت نور عيوني
وفرحي وشجوني
انت تؤم روحي
ودوى جروحي
و نصفي الثاني
ودفى حناني
انت وش أنت
انت أجمل شي بحياتي
وأغلى من ذاتي
ياأحلى الليالي
يانجم يلالي
وشرايك بالكلام
ولابالأفلام
عبادي:
تدرين أني طحت
من كلامك ذبت
حسيت اني راغب علامه
بطيرزي الحمامه
وين ذاكلام من بدري
ثلجي لي صدري
جننيني زياده
من غيركلام عاده
هادي بوسه
وخوذي بوسه
اميره:
طير زي الحمامه
بحبك ليوم القيامه
أذا مخلص بإحساسك
بأكون أقرب من أنفاسك
وأترك كل البنات
تشبع بوسات
بأرتمي بأحضانك
حتى يزيد جنانك
عبادي:
ماأبغى المسأله تطول
أنا من حبك مهبول
بأكون مخلص لك
وعن قلبي أتنازلك
وغيرك أقلع ضروسه
وتصرين أنتي العروسه
واخيرآ تبغين الحقيقه
أنا بعدك ماأطيقه
لاثانيه ولادقيقه
متى تحقق الأماني
وأعيش بعالم ثاني
خلاص أنتها الكلام
حبيبتي بدنا نام
تصبحي على خير
طوط .. طوط..
‎انتهت المكالمه
هذي اغلب الغزل الي بيننا وفيه خاطرة ثانيه .
أموت ولا أعيش بدنيا منت فيها
وش الحلو فيها أنت اللي محليها
ماأشوف بعيني أحد الا أنت
أيوه أنت
تدري وين أنت
بين الظلوع العوج
جوا عروق قلبي
ياويل قلبي
تدري أنت حلم حياتي
وأخرسكه وأخر محطاتي
انافدوه لقلبك
أنا الحبيب
انا المجنون الثاني بعد قيس
ياأغلى الناس
ياأحلا أحساس
أحبك أيه أحبك
خذ عيوني وبعيش طول عمري بلاهن
خذ قلبي وبعيش طول عمري بلاه
خذ عقلي خلهم يقولون عبادي جن
خذ عمري والعمر ياروح روحي يافداه
حبيبي حياتي عمري عيوني قلبي كل الكلام الحلو مكتوب لك
الدلع لك وأحلى لك والغنج لك الحب وهوالحب مخلوق ياعيني لك
آه ياهم الفراق والله ماينطاق
بس أموت ولا أعيش بدنيا منت فيها
طز فيها وش أبي فيها أذا منت فيها
كلمات عبادي
هذي كتبهااخر ايامنا ومرة سافرت خارج المملكه وكان جوالي مفصول يعني خارج التغطيه مايستقبل وجلست اكثر من اسبوع ومااقدرت اكلمها المهم يوم انا رجعت
اول ماوصلت الحدود السعوديه فتحت جوالي وكنت مرة تعبان تغير علي الجو دقت علي وفصلت واشوي وصلت البيت دقت مرة ثانيه وكلمتني بنرة حزن
قالت: الحمدالله على السلامه وقالت ه:ا معصبه
وحاولت اكلمها وقفلت واشوي بعد ثلاث دقايق دقت
قالت ماابيك تزعل مني وقامت تعاتبني وتشرح لي معاناتها يوم سفري تقول مانمت صابني الارق صارت نومي قليل خايفه عليك
وادق يوميا حتى يوم يقول مقفل الجوال ارجع وادق واخر شي تفاجاة انه يدق
ونقهرت عليك مادقيت ياخي برساله طمني
ولاماوراك احد وتبكي وهذ كانت من ناسبه قصيدة(
قالت غيابك
عبادي حيل اتعبني ..
صابني الارق
وصار نومي قليل ..


خايفه وقلقانه
والبسمه فارقتني ..
كله بسبة غيابك
شلت الهم شيل ..


حرام عليك كان
برساله تطمني ..
مو تدركني بالهم
و سهر وويل ..


قلت حياتي اسف
والله غصب عني ..
لا تظلميني وصبري
وصبرجميل ..


اميره خليني
ابرر ماجا مني ..
انا مريت بظروف
اشغلتني حيل ..


الله العالم وش
عنك شغلني ..
بس ترا مانسيتك
ونسي ما قال وقيل ..


طيفك معي
وكل يوم يحظني ..
وشوفك تبتسمي
بظلام الليل ..


و ريحة عطرك
وشعرك سكني ..
قسم بالله
قلبي لغير مايميل ..


اميره انتي حبي
انتي وطني ..
أنتي نور حياتي
انتي نجم سهيل ..
‏‎
‎عبادي
المهم مرة كنا متواعدين نتقابل بالليل الساعه 3ورحت للاستراحه اضيع وقت عشان الموعد وكنت لابس احلى لبس يعني مكشخ
المهم دقت علي الساعه 12ونص
قالت عبادي ماقدر اشوفك
قلت ليه
قالت خوالي جايين عندنا وهم وخلاتي وضاهر يبون ينامون. وتضايقت انا
وقلت : زين مع السلامه
قالت عبادي وش وفيك
غصب عني
قلت :زين انا بلاستراحه وعندي شباب يالله مع السلامه وقفلت واشوي بعد 3دقايق ارسلت لي رساله كاتبه بها
..مااحبك لما تزعل..
وحسيت اني مالي داعي كان غصب عنها انا لازم اقدرها وقدر ضروفها المهم باليوم الثاني كتبت لها قصيده (ماحبك لماتزعل)
تقــول مـا أحـبكـ لمـا تزعـل
طيـب مـو كيفـي لمـا زعلـت
***
قتلـت فرحتـي و ماتسـأل
ومـاحسيت فيني يوم تألمـت
**
يـومـ تشيكت ولبست الاجمـل
عـشان مـوعد البارح مانمـت
**
طريقي صعب وين الاسهـل
تبي الاسهل رح أتبع الازفلـت
**
بس تدري انا احبكـ لماتزعـل
ونكنت راظي أحبك أكثر ومازلـت

‎عبادي
ومواقف كثيرة وقصايد كثيرة وكلها بها وكانت تقول لي عبادي اكتب قصايدك بدفتر عشان ماتضيع طعتها واسويت دفتر ومرة أهدتني عطر وكنت حاطه بسيارة بجنبه الدفتر وتفاجات مرة انه من كب على الدفتر تخيلوا الدفتر عندي للحين
عمر الدفتر اكثر من اربع السنوات وريحة العطر موجودة للان وللمعلوميه اميرة حافظه قصايدي كلها وكانت اول شخص يطلع على القصايد ويعطيني رأي ..............
**

جائت ايام الكارثه اتصلت علي مرررة تبكي وتصيح
وااشفيتس كنت اقول تكلمي قالت عبادي انا ماقلتلك انا موبكتوبين لبعض وان الدنيا ذي تفرق ماتلم وتبكي
وكنت
اصررررخ عليها واشفيك اميره تكلمي
اميرره تكلمي لا تجنيني
>>
(( الجزء الاخير ))



قالت انا...


انا

انا
ياعبادي
!!



انخطبت؟

وبلاشعوووور
صحت صيحه قويه
أيــــــــش
لدرجة من قوة صيحتي
امي جتني
وقالت: واشفيك ياولدي
قلت مافيه شي
وسكرت باب غرفتي
وقلت: ها ايش قلتي اميره تمزحين صح قولي تمزحين علي ترا انا مااحب المزح الثقيل
قالت :ماامزح تقولها بصوت عالي وتصيح ماامزح
قلت:ليه ماصبرتي علي لين مااتوضف
قالت :موبكيفي
اغصبوني عبادي بالله انا بوافق عبادي انا ماشوف رجال غيرك بدنيتي وش اسوي
امانه لاتتركني تعال خذني مابيه ابيك تعال
وكانت وتصيح
ورحت لها الفجر
وكان الجو ممطر
مانساة ذاك اليوم
وتقالبنا انا وياها بسطح بيتهم فوق
اول ماشافتني
جتني تركض
وتحظني بقوة
وتصيح وتبكي
ماابي احد غيرك
ماابي تصيح بقوه
عبادي اموووت والله اموت
عبادي احكمو علي اعداااام
عبادي اذبحوني
انا احاول اخفف عنها
قلت: حبيبتي اقصري صوتك لااحد يسمعك من اهلك
لاتخافين انتي لي
لاتبكين حبيبتي وكنت امسح بشعرها وشوي امسح دموعها
وقول له ماابي اشوف دموعك
وبعدين من يقول انك لغيري انت لي حبيبتي
خانتني العبره وانزلت دموعي بلاشعور
حاولت اخبيها مااقدرت
وقالت: عبادي تبكي
قلت :ها لا لا هذ المطر جاء على وجهي
قالت: يابعدعمري ومسحت وجهي وحظنتني بقوووه
وشوي نزلت تحت تبي تبوس رجلي سحبتها بقوة
قلت: وش تسوين
قالت: عبادي ابي انكسر قدامك ابي اهين نفسي ابي اعلمك انك شي كبير بحياتي غالي أغلى من روحي
وقلت: ادري بس لاعاد تسوين كذا مره ثانيه
تعالي نتخبا عن المطر ورحنا جلسنا بزاويه بسطوح كنا حاضنين بعض ساكتين ومادريت الااذان الفجر يأذن
قللت :ابي اروح
قالت :لا اخليك اشوي
قلت :احسن خليني اروح لاحد يصحا
ومشيت رح لاقرب مسجد وصليت الفجر
وبعد الصلاه رحت اتجول بسيارتي بين الشوارع كانت مليانه مويه من المطر والشوارع فاضيه خاليه حسيت أني وحيد باهالمدينه
وقفت بمكان منتزه كبير
وجلست على كبوت سيارتي وزخات المطر تناثر علي
واناظر للمدينه وقول بقلبي وش كبر هالمدينه بس والله ماتشيل همي
وشوي اتذكرت دموعها
قلت لازم اشوف حل ماأتخيل دنيتي بدونها وركبت سيارتي ورحت اكمل تجولي
وكان صباح الثلاثاء
ودقت علي اميره العصر
وكانت تبكي
وقالت:عبادي خطوبتي يوم الخميس باقي يومين بسرعه عبادي شوف حل
قلت:لها زين حبيبتي انا بشوف حل
كنت اشوف الدنيا بعيني ظلمه
مادري وين اروح صار لي يومين مانمت وماكلت شي نفسي مسدوده عن الاكل وعن العالم ومشوش التفكير
وشوي الا جوالي يدق
الا رقم ماجد
رديت عليه
انا:هلاماجد
ماجد: هلا عبود وينك لي يومين
ماشفتك بس تبي الجد والله ولك وحشه
انا:ساكت
ماجد :وش فيك
انا :مافيه شي
ماجد:امس متعرف عليك ياأخوي انا معرفتي فيك عمري كله من اول ماطلعت بدنيا وانت بوجهي يعني اعرفك فيك شي بس وينك الحين
انا جايك
انا:زين انا بطريق المدينه اخر محطه
جاء ماجد وشاف حالتي تكسر الخاطر
ماجد:عبادي وش فيك
انا:اميره
ماجد:وش فيها
انا:يوم الخميس خطوبتها ماتمالكت نفسي وصرت اصيح
حرااام والله ياماجد حرااام
ماجد:هدي عبادي هدي
وش تبي تسوي هذا النصيب
هذا مقدر ومكتوب
انا:بس باقي فيه امل باقي يوم الاربعاء
ماجد:يعني وش تبي تسوي
انا:بكلم ابوي اذا ماوافق بخطفها واهرب انا وياها
ماجد:انت عارف رد ابوك بقول وتوظف وذيك الساعه اخطبلك وبعدين وين تخطفها بتصير فضيحه لها ولك وحنا بمجتمع محافظ
انا:ماجد انت جاي توسع خاطري ولا تظيقه!
خلاص روح يالله
خلني بحالي انا ادبر عمري
ماجد:والله ياعبادي ماقصدي اضيقها عليك بس هذي الحقيقه
وحتى لوكانت مره بتظل حقيقه
عبادي تعوذ من ابليس وادع لها بتوفيق
اميره مو منصيبك بس امش يالله
جاء يوم الخميس كنت جالس بغرفتي دقت امي
االباب رحت بفتح لها
فتحت الباب
وطحت على امي
اغما علي من قل الاكل ونوم

ودوني اخواني
لمستشفى
ويوم الجمعه طلعت
ولقيت بجوالي رساله
لقيتها من اميره
مكتوب فيها
عبادي انا خطوبتي اليوم
والله تمنيت انت اللي خاطبني
بس وش نسوي ياعبادي ذا قدرنا والحب بمجتمعنا ممنوع
يعني الحب صار مو بيدينا
عبادي تذكرحلمنا الوردي ماراح يتحقق
وتذكر الجزيره والبحر والورد الي نبي نسكنها خيال في خيال

احبك ياأغلى شخص بحياتي
بس ماراح انساك
وكتبت قصيده بالموقف هذا
ليـــت الحـلــم يتحـقـــق ولا يصــبح مــحـــال ..
ويـــتصيــر الحيــاه حلـوه وتحلـــى أمـــانينـــا ..
ونعــيش علــى أمــل صـادق وعلـــى أمـــــال ..
وتحلـــى الأيـــام والسهــر وتحلـــى ليــالينــــا ..
نبـــي نعيش الفرحــه نبــي نمحـــي خـيـــــال ..
نبـــي البسمــه والبهجـه نبــي نســى ماأسينـــا ..
ويتغيــر وضـــع الحـياه مــن حـــال الــحــــال ..
ونبتعد عن الحــسد والكــذب والي يجافيــنا ..
ونجعـــــل لـــحياه صــوره بأفضــل وأروع جمـال ..
ونملـــي قلــوبــنا بالـحــب لاكــــن مـو بيادينــا ..
كلمات
عـبدالمـــحــسن العنزي




؟؟؟؟؟؟؟؟؟؟ وتزوجة وبعد ست اشهر غياب دقت علي
قالت عبادي وش حالك وش مسوي بغيابي انشالله مستانس ها بشر اكيد كاتب قصايد جديده وكنت مجهز لها قصيده رد علىها

تبي تعرف وش حالي حالي حزن والم
على بالك ايامي من بعدك سعيده
لا وبشرك لا اعرف لاورق ولا قلم
ولاعاد اكتب خواطرولاحتى قصيده
انا ياعمري ماني من اللي طاح وسلم
انامن اللي طاح ولا أعرف من يعيده
انا مدري عايش واقعي ولا بحلم
ماني مصدق فاقد امير قلبي وسيده
عمري قصتي تصلح لأنتاج اروع فلم
فلم عن الرومنسيه عن عذاب قلوب مجيده
تدري وش ابي أختارله اسم افضل أسم
أنتي بين أضلعي قلبي أنتي الوحيده
لاكن الله يصبرني على فراق الوهم
والله يعين من حب من شريين قلبه وريده
ك عبادي
المهم
قلت لها: ها كيفه زوجك انشالله مسعدك
قالت :بالعكس عبادي يحبني وحلوة معاملته معي
قلت: زين انا بطلع من حياتك قالت: عبادي لا لا تروح عبادي
امانه عليك انت حبي الوحيد عبادي
قلت :لا زم اخليك حرام تخوني زوجك وانا اقولها من ورى قلبي المهم صارت تدق علي لين رجعنا لبعض يمكن اكثر
وقلت يمكن في امل انها تتركك زوجها واتزوجها
المهم بعد فترة
قالت :عبادي ان حامل انصدمت
حسيت اني مصوب برصاصه ماصدقتها بعدين عرفت ان حياتي كلها صدمات بصدمات
بعد فترة جابت بنت ؟؟؟ اسمها ريماس
المهم حسيت ان الوضع صار اصعب مااقدر اتزوجها خلاص اميرة راحت !
انا بعد ماتزوجه وجابت بنتها بفترة توظفت
وقلت :لها خلاص اميره انا توظفت والحين مالي عذر
قالت: خلاص عبادي فات الاوان قلت :يعني وشلون فات الاوان
قالت : انا معي بنت وانا ماأقدر أخليها
قلت :ماعليك اذا قصدك بنتك
انا اربيها بس اطلبي طلاق تطلقي
قولي له الحقيقه انت ماتحبينه
او خليني اذبحه شوفي لي حل
انا ماأقدر اتحمل تعبت تعبت
يااميره
انا بيني وبينكم وصلت مرحلة هستيريا ي..
قالت عبادي لوطلبت الطلاق وطلقني مو مخلي ريماس معي وحتى لو ذبحته بتخش السجن بكل الحالتين انا خسرانه
عبادي تكفى خلاص لاتذبحني عبادي حبنا كان حب مراهقه والحين كبرنا خلاص افهم عبادي انساني لاتدق وكانت تبكي وشوي سمعت صوت بنتها تصيح
قالت امانه عليك عبادي سامحني وقفلت السماعه
وارسلت لي رساله مكتوت
فيها
عبادي ارجوك رجا لاتتصل بي
االله يسعدك مع وحده غيري ويوفقك
انا لقيت راحتي مع زوجي وبنتي
عبادي اسفه
انا ادري انها ماتقدر على فراقي وانها قالتها غصب عنها بس وش تسوي هذا قدرنا وحنا لازم نؤمن بالقدر وكتبت قصيدة
( (قالت خلاص ارجوك لاتتصلبي...
الله يسعدك وتعيش بدنياهنيه
قلت وين القاالسعاده وأنت حبي
دنيتي في بعدك صارت حزينه
قالت عبادي دربك ماهو دربي
ولا تفتح اجروح كانت دفينه
أنا راحتي مع زوجي وبنتي
رح غيري بيلقى قلبك ظنينه
قلت لاولله بتوقف دقات قلبي
والعذاب والسهر حان اينه
بس كافي تجريح ولي وصلبي
أي أست أحلم التقي في حنينه
ياخيالي الواسع فيها لاتخذلبي
أناالوحيدبالمينااناربان السفينه
اناالي كنت اصارع امواج تلعبي
فاقد حنان لاكن الحنان وينه
مابي خيالي يطول ويهوجسبي
برفع يديني للي ماتنام عينه
يارب يارحمن لدعوتي تلبي
أن سعاده ماتفارق جبينه
وتخليها ماتنسا عبادي اللمبي
وذكرى ايامنا وعشره سنينه
ك:ع
سمعتها القصيدة قامت تبكي وقالت عبادي احس فيني
انت حبي وانا والله ماحبيت غيرك بس هذا زوجي وابوبنتي
قلت بالعكس انا من اول ابي اتركك بس انتي وقتها رافضه
بس اميرة بالله انتبهي على روحك وكل بعد فترة طمنيني عليك
لواقل شي برساله انك بخير..وللمعلوميه اميرة رحلت عن المدينه اللي انا فيها
سكنت بالغربيه بسبب ظروف عمل زوجها
انا للامانه جلست فترة تعبان ومتأثر مرة ومااني مستوعب اللي صار احاول اقنع نفسي انها راحت مع زوجها مااقدر تعب والله تعبت كثير وصرت كل مااشوف بنت بتلفزيون ارسم ملامح اميرة فيها واقول هذي اميرة جلست احتمال سنه وانا على هالحاله واصرت اسافر كثير وغير جو ومااجلس بالبيت حتى الحمدالله عدت مرحله حلوة بحياتي وقلت لازم انتبه لنفسي والحمدالله
وصارت تكلمني من شهرين الست شهور تطمني وتعطين دروووس لحياتي
وكانت تقول :انت اخوي الغالي الصغيرلازم تنتبه لحالك والحمدالله مااقولك نسيت بس مااكان تأثيرها مثل اول
الحب انا عشته بأنواعه مع اميرة ..
بس والله الحب حلو بعذابه بمرة حلو
الحب يخلي روحك حلوة ويخلي الدنيا بعينك حلوة

)(الحب الصادق الطاهر الشريف هذا هو الحب ))

الكاتب:
عبدالمحسن العنزي